و رجعنالكم بعد غياب , و حابين نبدأ بموضوع مهم جدا بيواجه أغلب الناس اللي بتحضر نفسها للسفر و هي مشكلة قبول فيزا الشنجن , عشان كده في الموضوع ده هنتكلم على أغلب الأسباب اللي ممكن تخلي الشنجن ما يتوافقش عليه و هي :
1. اهم حاجه في كشف الحساب اللي بتقدمه أنه يكون عليه عمليات سحب و ايداع كتير خلال اخر 6 شهور , و ده يعتبر اهم من المبلغ الموجود نفسه , بس كمان لازم تثبت انك قادر انك تعيش هناك و تصرف بدون مشاكل ممكن تواجهك و إنت مسافر.
2. الصورة اللي هتقدمها لازم تكون غير صورة الباسبور ( حتى لو حديثه ) المهم تكون غير صورة الباسبور.
3. تأمين السفر لازم يغطي طوال فترة اقامتك هناك .
4. بسبب ظروف البلد الاقتصاديه شباب كتير فعلا بتفكر تسافر و ماترجعش بلدها تاني و ده من اكتر الأسباب اللي بتخلي نسب رفض الفيزا للمصريين عاليه جدا , فلو بتفكر أنك تسافر علشان تهرب و تكسر فيزا , فخلي بالك موظفين السفاره بيعرفوا ده كويس و فيزتك هتترفض.
5. لو هتسافر بدعوة من صديق او دعوة من واحده صاحبتك علشان تروح تتجوز هناك , فنسب رفض الفيزا هتكون كبيره جدا علشان ده هيثبت لهم أنك مش راجع تاني .
6. للأسف السائح المصري مش مهم أوي للسياحه الأوربيه لأنهم عارفين أنهم مش هيستفيدوا منك أوي و عارفين أن أغلب الشباب بيروحوا عاوزين يلفوا أوروبا كلها بأقل التكاليف.
7. لازم تقنعهم انك مسافر فعلا علشان سياحة و ده بيتم أنك تقدم برنامج سياحي محترم لكل حاجه هتعملها هناك بالتفصيل , عشان يعرف أنك فعلا رايح للسياحه فقط مش حاجه تانيه . و لو رايح لمؤتمر مثلا يبقى يكون معاك دعوة رسمية من مؤتمر أو مكان ليه اسمه و محترم , مش مجرد انك تسجل اسمك في اي مؤتمر يعتبر دعوة من مؤتمر.
8. لو هتزور أكتر من بلد و ده اكيد حيحصل , حاول أنك تعمل البرنامج السياحي اللي هتقدمه للسفارة في البلد اللي انت مقدم عليها فقط , بمعنى لو هتقدم على فرنسا و هتزور 5 دول معاها يبقى تعمل برنامجك على فرنسا , لكن خليك ذكي ماتقدمش مثلا برنامجك أنك مسافر باريس و هتقعد أسبوعين علشان محدش هيصدقك , لازم تنوع المدن اللي هتزورها , يعني تكتب انك هتزور مثلا مدينة كان و ليون و بوردو و نيس و هكذا
9. الأفضل ان تذكرتك تبقى للدوله اللي هتطلع منها الفيزا , حتى لو كانت الدول دي هتروحها بعدين خلال زيارتك و هتقعد فيها اطول مده. المهم تكون هي وجهتك الأولى .
10. الصراحه كده , مفيش قواعد لرفض أو قبول الفيزا , العمليه ملخبطة شوية و ملهاش أي قواعد للرفض أو القبول , ناس عمرها ما سافرت باسبورها أبيض و حسابها فيه 5 الاف جنيه و خدتها , و ناس كان معاها شنجن 7 مرات و فيزا أمريكا و 12 فيزا تانيين و حسابها فيه 100 الف جنيه و أترفضت , فالعمليه مش مضمونه لأي حد.
11. أوعى تصدق أي شركة سياحه تقولك احنا هنطلعلك الفيزا الا لو بتحب يتنصب ويتصحك عليك , شركات السياحه بتساعدك فقط في أخذ موعد و ترتيب الأوراق و تعبئة الأبليكشن و حجز الطيران و الفندق , غير كده الشركه ملهاش أي علاقة بقبول أو رفض الفيزا.
12. في حالة رفض السفاره ليك فبيانتك بتفضل على سيستم شنجن خلال 6 شهور , و لازم اما تقدم في نفس السفاره اللي رفضتك تاني اذا هتسافر خلال ال 6 شهور , أو تنتظر بعد ال 6 شهور و تقدم على أي سفاره و في الحال دي كل بياناتك بتكون اتمسحت من على سيستم شنجن الموحد . و وجود ختم الرفض على الباسبور مش بيؤثر في حاجه اذا قدمت تاني
13. نصيحة : لو هتسافر أوروبا شهر عسل منصحكش , لأن أوروبا أغلبها مشي و زيارة متاحف و معالم أثريه و تعب , و تجربة أنك تقدم على شنجن و تترفض قبل الفرح مع ترتيبات الجواز هتبقى تجربة مش لطيفه , فالأفضل أنك تسافر دوله فيزتها سهله أو بدون فيزا اصلا و خلي أوروبا بعدين .
و في نهاية موضوعنا نتمنى ليكم التوفيق جميعا و في إنتظار أرائكم و إستفساراتكم اللي هنرد عليها في أقرب وقت ممكن إن شاء الله, و ماتخافوش العالم مش كله أوروبا , فيه دول تانيه كتييير تستاهل فعلا الزياره . أبدأ بالسهل الأول و جرب احساس السفر و المغامره و أطمن الصعب هييجي بعدين .
